樂樂 6歲喇，大個仔，生生性性努力製造下一代喇。

根據統計處嘅資料，香港人口趨老化，未來嘅生力軍，好大程度要靠內地新移民製造新生代。海洋公園嘅大熊貓都面對同樣問題，上一代嘅安安、佳佳已經喪失咗行房嘅精力；新一代嘅盈盈、樂樂血氣方剛，但係過去一年得個搞字，始終冇辦法整隻土產大熊貓，唔知大家有乜好建議幫吓佢哋。
海洋公園噚日幫兩對大熊貓搞生日會，其中盈盈、樂樂已經 6歲嘞，佳佳就慶祝 33歲大壽。大家唔善忘嘅話，一定記得海洋公園今年 3月大鑼大鼓隆重宣佈，話盈盈、樂樂長大了，識得學人爽 YY了。大家以為好快會誕生第一隻 made in HK嘅大熊貓，點知希望落空，海洋公園噚日交代樂樂膝下猶虛嘅原委。
今年 3月，熊貓女盈盈開始發情，海洋公園拿拿臨安排佢同樂樂孤男寡女共處一室，仲安排埋人工授孕。點知兩隻衰嘢學足時下嘅香港夫婦，房照行，仔女就唔願生。獸醫連月來不停觀察，點都搵唔到盈盈有懷孕徵兆，惟有再等下年發情期。
話晒係國寶，盈盈樂樂背負住 700萬香港人嘅憧憬同期許，佢哋搞唔搞、生唔生，絕對唔係佢哋兩個嘅私事。所以海洋公園已經委託咗全國大熊貓基地臥龍嘅專家幫手，想辦法搞大盈盈個肚，又話民政事務局都會配合。八方奇怪，點解呢壇嘢唔係漁農自然護理署負責，又或者食物及衞生局幫手；周一嶽處理內地婦人來港產子有經驗，唔應該袖手旁觀囉。



盈盈 6歲生日，八方喺度祝佢萬子千孫，年生貴子。


安安老懷安慰咁望住個壽包，唔知佢許咗個乜嘢生日願望呢。

佳佳係全球第二長壽

佳佳 33歲大壽，原來佢係全球第二年長嘅大熊貓。

[節錄...]

引用:蘋果日報網站