瓏門收樓　廚房要執漏

[img]http://static.apple.nextmedia.com/images/apple-photos/video/20130910/org/1378758422_6d5c.jpg[/img]

屯門新盤瓏門一期入伙，分層戶業主陸續取匙，記者上周與專業測量師和驗樓公司分別檢驗三房戶和兩房戶，其中三房戶現五個瑕疵，尚算優良，但兩房單位就難接受，廚房鋅盆竟然漏水，負責驗樓的測量師龔瑞麟直言：「優良真係唔敢講，因為廚房漏水，真係要試好晒先交畀業主。」

[img]http://static.apple.nextmedia.com/images/apple-photos/apple/20130910/large/0905yiu1001z.jpg[/img]
■瓏門一期繼特色戶收樓後，分層單位業主亦陸續取匙。

瓏門一期位於西鐵屯門站上蓋，出入可經基座商場V City，率先檢驗單位是1期3座低層D室兩房戶，實用478方呎，業主一手買入價約447萬元，由香港測量師學會副主席龔瑞麟檢驗。

[img]http://static.apple.nextmedia.com/images/apple-photos/apple/20130910/large/b1001a.gif[/img]

龔Sir走勻單位，「廳、房都無乜問題」，殊不知驗到廚房，問題就接踵而來。首先鋅盆來去水，水位越升越高，去水位防溢功能全無，龔指出：「來水咁慢，去水速度仲慢過來水，我哋叫呢啲做overflow，可能條喉接駁唔好，或者有嘢塞咗喺度……理論上，過咗（去水位）一半，唔應該再升。」他叫記者：「你開猛啲試下。噢！過咗窿位（去水位）。」連忙關水喉，否則廚房水浸。接着拔走鋅盆水塞，再打開廚櫃底，發現一灘水漬，原來鋅盆漏水。再試一次，漏水情況持續，一定要搵新地執漏。

[b]工作平台雨後有積水[/b]
上周四驗樓時間剛好是大雨後，推開與廚房相連的工作平台門，赫見積水，「平台斜度有問題，令積水未能自然流向去水位。」龔Sir拎出一蚊銀說：「行內通常用呢個去釐定平台傾度夠唔夠，如果積水可以浸滿一蚊硬幣，咁就唔合格。嗯……未浸滿一蚊喎。如果業主要求重鋪，發展商未必肯。」另部份設計問題亦有潛在危險，如雪櫃採用玻璃門面，開盡後會撞到牆身玻璃鏡，「裝修師傅都發現呢個問題，於是係櫃門貼透明膠粒，防止撞爆。」


[img]http://static.apple.nextmedia.com/images/apple-photos/apple/20130910/large/b1001b.gif[/img]
【廚房】
■廚房鋅盆一放水，盆底隔氣喉就見到接駁位有一滴滴水漏出來（箭嘴示）。　謝榮耀攝


[img]http://static.apple.nextmedia.com/images/apple-photos/apple/20130910/large/10br103p.jpg[/img]
【工作平台】
■工作平台有積水，反映平台傾斜度不足。惟積水要浸滿一元硬幣，才會考慮重鋪。


[img]http://static.apple.nextmedia.com/images/apple-photos/apple/20130910/large/10br104p.jpg[/img]
【細房】
■三房單位的細房其中一扇窗戶開關過緊。　梁志永攝


龔瑞麟總結：「牆身有花痕，雲石有啲崩，屬小瑕疵，交大樓來講，可以接受。惟一最大問題是廚房，鋅盆漏水係唔應該發生……總括來講，屬中上，優良就唔敢講，因為廚房漏水，真係要試好晒，先交俾業主，唔應該由個業主發現。」
第二個檢驗單位是1座中層H室，實用722方呎，屬三房戶，業主一手買入價約732萬元，今次由香港驗樓的四人團隊負責，隊長Johnny表示，整個單位沒有大問題，主要是有幾處瑕疵，包括主人套廁洗手盆雲石崩裂、細房間窗較太緊、細房間電掣未能通電、露台現空心磚及廚房雪櫃失靈，似乎細單位收樓質素較貴價單位為差。


來源:蘋果日報網站