青心直說：唔怕「老點」至緊要「識閃」

[size=5]影響內地經濟決策嘅部委，派系多、架構複雜，但數當今最缺乏權威嘅經濟決策機關，非發改委莫屬。近年一次又一次例子證明，發改委多次預測錯誤，簡直係「老點」市場。
全球資金氾濫，發改委去年高舉雙底衰退威脅，誤導中央，錯失及早果斷控制通脹時機。面對囤積居奇市場炒賣，發改委多次表示食品價格快將見頂回落，結果又一次成為空言，月初發改委主任張平話調控物價措施已見成效， 2月份通脹會「低一點」。就憑呢 3個字，市場被「老點」，內地股市之前上升，可能就係佢嘅言論所賜。
結果國家統計局公佈 2月通脹率係 4.9%，上游通脹仲「破七」。更令發改委冇面嘅，係控制食品價格本屬佢嘅職責，全世界以為至少食品價格會回落，點知升幅竟達 11%，較 1月更嚴重。


𥄫實 A股領先板塊
內地通脹其實從未降溫，過去 3個月 CPI持續高企。物價飛升，唔少內地人利用滙率優勢來港掃平貨，這可能解釋到 2月內地零售銷售數字遠遜預期嘅原因。
發改委前身係計委，之前內地側重計劃經濟，發改委影響力一時無兩。環境有變，中國正在進步，發改委創造力卻不足。總理工作報告列明未來 5年增長目標 7%，但偏偏今年目標定於 8%，情況表面奇怪但背後似乎暗示，主張大搞增長嘅發改委仍然主導話事權。人行比較奉行市場規律，傾向以控制通脹為首要任務，同發改委多次角力，令內地政策經常出現時收時放，唔同部委官員亦經常發放矛盾嘅言論。
面對上有政策角力、下有對策博弈，投資者針對政策出擊時難免要左閃右避，不斷提升對內地政策嘅關注同敏感度。基於永遠有既得利益者，政策永冇秘密可言，股價先行反映春江鴨嘅部署，投資者除關心每日美電變化監察資金流異動，更需關注內地股市領漲同領跌板塊個股移動，即係同一行業個別股份走勢出現同步一致嘅現象。

胡孟青
[/size]