2010-1-23 14:27
vv18
老頑童食遊記（8）之全真頑童大鬧風波莊 - 多相
老頑童食遊記（8）之全真頑童大鬧風波莊 - 多相
我老頑童不嬲鐘意雲遊四海，無拘無束， 對全真教教務不嬲都唔多理會！ 但係早幾日收到掌門ruocen 飛鴿傳書話全真教比人踩場，重夠膽死設下英雄宴邀請我付會！對方原來係江湖最近新掘起幫派-風波莊，佢重夠膽死叫埋我D死對頭東邪 西毒 一齊黎踩場！！嘿....你老闆我老頑童個場都咁踩，真係未死過！於是昨夜我就帶同全真七子再加郭靖同蓉兒一同夜探香蜜湖，一於黎過老頑童大鬧風波莊！
去到已經見到各門各派齊集風波莊！風波莊弟子一見到我已經即刻感受到我股全真真氣，紛紛退避三舍！ 經我大喝一聲，佢地即刻引路指引我去英雄宴地方！嘿....算你地風波莊知機！小喇聲，呢個風波莊雖然係新掘起，但睇佢地門派弟子法度嚴謹、排列有序，個個弟子叫口號都非常整齊，就知道佢地莊主真係唔係野小。而且全個莊苑裝修古雅別致....靚過我地道觀多多聲！ 真係恨不得自己過埋底做佢地教主，到時重唔係酒池肉林、夜夜生歌、呵呵呵呵.............
唔得，我身為全真教元老，唔可以有失身份。 好，噶然風波莊設下英雄宴，我就睇下佢地有咩板斧！只見風波莊莊主大叫一聲，即刻有一個力大無窮弟子走左出黎。原來佢地今次英雄宴，係要考驗我地全真派噶武功！重設下重重關卡要我地逐一闖過。否則就要承認風波莊係江湖第一大莊！嘿，噶然你地挑釁在先，我老頑童起會示弱！好，今日我就施展我成名絕技-左右搏擊之術，就黎一個殺一個，黎兩個殺一雙吧！
首先挑戰者叫做大力丸（$4一粒）
[img]http://img188.imageshack.us/img188/8697/1001102328b68c1aff7e428.jpg[/img]
佢個樣真係幾大力下！成粒好大粒下，重有豬肉同雞蛋黃係入面！但冇用鴉，凍鬼晒，咬落去蛋黃好乾下，不過D豬肉都算幾淋。相頭算唔錯，好啦，就比6分你啦！勉強都叫見得下人噶！
可能佢地見我兩下手勢就打敗大力丸，所以佢地莊主即刻發動人海戰術！連續叫左三個弟子一齊黎挑戰我地！okok, 多多都冇有怕！黎黎黎，今日有交打，正好讓我呢個老骨頭大展身手、痛快痛快！
佢地連續排左小炒拆骨肉（$32）、小炒羊肉（$38）同鐵板田雞（$48）出黎！老實講，三個個樣無論係外形同味道都係差唔多！完全分唔到邊個打邊個！ 唔講重以為三個係同一個阿媽生出黎！先講小炒拆骨肉，真係妹仔大過主人婆，配料多過肉，D肉又鞋，一d都唔好味！最多比3分！
[img]http://img46.imageshack.us/img46/348/1001102328eadf3ae4b7226.jpg[/img]
打低左拆骨肉後，小炒羊肉即刻撲埋黎！呢個勁喇，佢識九陽神功，好似好打得！但原來佢只係練到第二陽，所以又係完全冇料到！而且最神奇係味道同拆骨肉同出一徹！而羊肉完全係冇羊味！重要鞋到嘔，所以真係易過借火幾下手腳又搞掂！呢味冇野講，2分都比多佢！
[img]http://img46.imageshack.us/img46/9480/10011023283bf7238717179.jpg[/img]
跟手黎過鐵板田雞睇個樣以為好勁，點知又係金玉其外、敗絮其中！ 即係得個樣！雖然佢功夫好過之前兩個，但要成$48，味道同之前兩味又係差唔多！係唯一可取之處叫做D肉多小小同冇咁鞋！唉....見到咁我都廢鬼事煩，求其左手劃個圓圈，右手劃個正方打法左佢算數。呢味念在佢個樣好樣D同D肉冇咁鞋，就比4.5分啦！
[img]http://img46.imageshack.us/img46/2048/100111235103c5dda7ef8e9.jpg[/img]
打完第一會合，完全冇受到咩考驗。 可能莊主都覺得勢色唔對，即刻派出風波莊四大名捕出黎！分別係手撕雞肉（$36）、美極豬手（$38）、鐵板土豆王（$18）同埋干鍋金翅脆豆腐（$22）一齊迎戰！
先上黎係手撕雞肉，傳聞佢小林擒拿手已經練到爐火純青地步，點知遇到我呢個食雞高手真係無運行！D雞肉鞋殺殺唔在講，重要完全冇味！真係唔明點樣賣$36？重衰個之前果串燒三兄弟！所以無野講，得1分！1分係比D配菜咋！
[img]http://img46.imageshack.us/img46/2869/10011023286099fba3ccc99.jpg[/img]
跟住輪到美極豬手出黎，講真呢個豬手有小小料到！佢一手降龍十八掌功夫並不比我靖兒弱！打得頭頭是道！雖然賣相一般，但豬手真係整得好淋，重幾入味，唔同之前幾道全部齋辣！係暫時咁多個之中最好噶！所以決定比到7分！終於都有味見得下人喇！
[img]http://img46.imageshack.us/img46/7296/1001102328e89d6d58e0855.jpg[/img]
然後到鐵板土豆王出場！呢個厲害喇！使出求千仞噶一代絕學鐵沙掌！好睇就好睇喇，但始終唔係我果皮！用噶油超多，多到可以用黎浸死人！雖然幾好味，賣相都唔錯，但真係同食油冇分別！呢D咁唔健康噶菜式，真係小食為妙！所以，我只可以比6分。
[img]http://img46.imageshack.us/img46/573/10011023289a2cff5097cf0.jpg[/img]
我一連打敗晒佢地七個人。風波莊莊主見到佢地節節敗退，即刻叫左佢地第二大弟子干鍋金翅脆豆腐出黎！講真，呢個真係幾勁！首先已經有隻鑊啊一路慶住D豆腐，噴噴聲，唔驚變凍！ 而且佢一身橫功軟衛甲真係幾硬淨，打極都唔痛！重打到我手軟。呢味菜除左賣相唔錯外，D豆腐吸晒D味真係非常之好食！我今次一定要比8分先得！再送多三個字比佢：平、靚、正！
[img]http://img46.imageshack.us/img46/4606/100110232894431a9044af5.jpg[/img]
終於打完第二回合，真係越打越起勁！莊主見我勢不可擋，一於同我玩晒冷叫晒所有弟子出黎！即刻殺上黎噶係五郎八掛棍（$18），個名好似好勁！但個樣完全唔掂！同油浸豆角冇分別！又係辣辣地，但最弊D豆角老到死好似食柴皮咁！唔掂，2分！唉....
[img]http://img46.imageshack.us/img46/5997/100110232832f5769304276.jpg[/img]
打完個廢噶，跟手連黎兩個食齋噶對手！第一個叫童子神功（$22）。唔怪得食齋啦，練埋D咁噶功夫！ 呢碟野係娃娃菜加埋D雞蛋絲一齊做。雖然又係好多油，但娃娃菜加左蛋絲整得出乎意料之外幾好味！係繼脆豆腐後我幾鐘意噶一道菜！而且價錢唔算貴，唔錯唔錯！有6.5分！扣左1分係因為太多油！
[img]http://img46.imageshack.us/img46/1186/10011023284e42e5992f160.jpg[/img]
第二個食齋噶叫做天地混然大法（$15），即係皮蛋炒波菜！老實講，感覺同我係全真道觀食果D清茶淡飯冇分別！越食越覺得自己淒涼！ 真係兩隻手指就打低佢！唉....呢D料都可以law 出黎見人，風波莊莊主搞咩呀？冇野講，得2分！
[img]http://img46.imageshack.us/img46/4083/1001102328185f193e08259.jpg[/img]
打到呢到，我老頑童都有小小攰喇！ 戰況亦已去到白熱化階段！佢地人海戰術果然犀利呀！再黎噶，份量絕對十足，叫做雄霸天下（$36）！嘩，真係趁我命law 我命！其實係食辣魚！查實在下小食魚、而且碟魚都好多骨頭，爭D比D骨頭硬親，要命喪風波莊！但點都好絕對唔可以抹殺呢碟魚噶好味！魚身好滑，有魚味，真係唔錯！係一個好強勁噶對手，絕對有7分！
[img]http://img46.imageshack.us/img46/485/1001102328d6d6778af3031.jpg[/img]
跟住呢個勁喇！呢個係識南山刀法噶南瓜餅（$1一個）！係風波莊鎮莊之寶！ 所以話jei....唔係平野冇好噶！呢個一出來就掘掘迫人，刀鋒霍霍，絕對係最最最強勁噶對手！佢唔只皮薄餡靚，重要甜味岩岩好！只見佢刀法大開D合，隱隱然顯出係師出名門，實在令我不斷後退，才可化解危機。冇野講啦，要比最高分噶8.5分喇！
[img]http://img46.imageshack.us/img46/3119/10011023282643068d3c4ff.jpg[/img]
係重對戰緊南瓜餅同時，餘下兩個弟子，一個叫鐵掌水上飄（$6），一個叫玊女心經（$16）兩個已經一齊殺上黎同我作最後決戰！ 先講水上飄，呢個人如其名，淨係識得周圍飄，冇料到！就好似食緊生菜魚肉一樣！只見湯底好似打完邊爐噶湯底咁勁多油，跟住D所謂魚肉原來係麵粉加雞蛋做成，完全冇口感，好似食麵團咁！唉....唔比2分都唔得！而個玉女心經就好D，可能同我鐘意玉女有關！但呢個玉女唔係我食開噶玉女，而係唔知邊到地方噶玉女，酸酸地，又爽爽地，幾開胃幾好食！不過冇用鴉，最後先走出黎，只見我老頑童大喝一聲，施展出我平生最強絕學-頑童齊齊震，一野震走晒全部人！ 終於，呢場世紀決戰，就此落幕！
[img]http://img46.imageshack.us/img46/1042/1001102328a34d20c6f71f6.jpg[/img]
風波莊莊主見到我老頑童大發童威，終於知驚！嘿....睇下你下次仲敢唔敢踩我老頑童場！最後，佢地都好識做拎出佢地噶名酒女兒紅同英雄酒黎陪罪！算佢地知機啦！
整體黎講，呢間野服務同地方都一流！ 但真係用得太多油喇，食到我肥上加肥！ 而且好奇怪係佢地貴噶菜反而冇平噶菜咁好食！ 同埋佢地上菜上得太快，搞到有D菜凍左冇咁好食！不過點都好，呢度都不失為一個帶女女去拍拖好去處。始終地點方便，一出香蜜湖地鐵站出口就係！而且佢地D包廂又唔貴，可以裝十幾人最低消費都係四百蚊！圍番幾十蚊一個人有咁噶享受同服務真係唔錯！只要佢地改過以上缺點，我老頑童一定會再拜訪風波莊莊主！
呵呵，青山不改、綠水長流，後會有期喇！