2009-5-5 10:22
naira
豬流感無阻真愛 汪明荃、羅家英賭城結婚
【荃情報喜用愛將心偷】一向敢作敢言的阿姐汪明荃，上周五無懼豬流感入侵美國，與羅家英出發到當地做騷，原來二人今次美國之行除𢱑銀外，更玩鬼馬秘密結婚。現年 61歲的阿姐和 62歲的家英哥，在抵達美國後，即於當地時間 2日往拉斯維加斯註冊結婚，結束 20年愛情長跑，新郎哥羅家英昨日談到老婆大人的心情時說：「笑到見牙唔見眼。」
現年 61歲的汪明荃與 62歲的羅家英，因合作演粵劇而擦出愛火花，二人拍拖至今 20年，被視為圈中打風都打唔甩的模範情侶。拍拖以來，家英哥曾多次向阿姐求婚，不過阿姐曾在感情路上經歷幾番波折，不欲再被一紙婚書束縛而婉拒。但自從阿姐與家英哥先後患上癌症，兩人在風雨路上互相扶持後，阿姐對婚姻的看法也漸漸改變過來。
上月公開跪地求婚
上月 17日，家英哥在紅館舉行的百老匯式歌舞喜劇《真係阿姐——汪明荃》中，再次公開跪地向阿姐求婚，雖然阿姐當眾請家英哥食檸檬，但其實她早已芳心暗許，二人並玩神秘瞞住一眾好友如鄭裕玲及林建明等，到美國註冊結婚。昨日下午，身在美國的阿姐親自打電話向無綫總經理陳志雲宣佈喜訊，並透過無綫向傳媒公佈已婚消息。
阿姐昨日發放的結婚照中，她穿上紅色旗袍襯紅色頭箍，打扮大方得體，家英哥則穿上深藍色西裝襯火紅蝴蝶結，英偉不凡，二人左手均戴上結婚戒指，幸福之情洋溢。阿姐與家英哥目前正在度蜜月，美國時間 5月 9日則會到洛杉磯為《絲竹雅集》粵調金曲欣賞會演出，待至月中才返港。
「佢笑到見牙唔見眼」
記者昨日致電恭賀新郎哥羅家英，心情勁靚的他在長途電話中連聲說多謝，問到他為何選在拉斯維加斯註冊結婚時，他不忘搞笑本色說：「冇乜嘢點解嘅，因為方便就手囉！」是否計劃了很久？家英哥否認道：「唔係，因為去羅省（洛杉磯）登台啫。」究竟怎樣向阿姐求婚？他笑說：「總之互相同意啦！有一日我同佢講：『我哋去羅省登台喎。』佢話：『好呀。』跟住我話：『去埋拉斯維加斯啦！』佢話：『好呀。』咁我再話：『咁去埋結婚啦！』佢話：『好呀。』就係咁囉。」記者笑指他求婚不夠認真，家英哥連聲否認說：「唔係，我講嗰陣好認真，阿姐都答得好認真。」
問家英哥註冊結婚當日有甚麼親友出席時，他說：「阿姐細佬同家人，同埋我自己啲家人。其實我哋想去教堂行禮嘅，但因為太倉卒， book唔到教堂，只係去咗當地婚姻註冊處。」有否帶備戒指往美國結婚？家英哥開玩笑說：「鎖匙圈咪得囉！其實戒指喺當地買，唔使咁名貴嘅。」結婚當日心情如何？他說：「梗係開心啦，阿姐笑得好燦爛，開心過我，佢表現得好瘋狂。」如何瘋狂？他說：「笑到見牙唔見眼囉！」其後家英哥表示翌日要一早起身與阿姐打高爾夫球，便匆匆掛線睡覺。
無綫外事部副總監曾醒明昨日說：「 TVB嫁女，阿姐今日下晝 3點打電話畀陳志雲公佈喜訊，話喺美國時間 5月 2日，即係農曆四月初八，喺美國拉斯維加斯同羅家英註冊結婚，阿姐話佢係 TVB一分子，所以透過 TVB公佈呢個消息，同埋 e-mail咗張相發畀傳媒。」曾醒明透露阿姐現時正在休假，至本月 22日才會復工，出席無綫新劇《女皇辦公室》的造型記者會。
阿姐自爆未有洞房
此外，與阿姐相識多年的鄭裕玲昨日說：「今日先知，下晝我同至八會班人約咗一齊學畫畫，我即刻打電話恭喜佢哋，我聽出阿姐好開心，我哋仲一齊開香檳影咗張相，會傳去畀阿姐睇。」林建明則在電話中說：「我同阿姐通過電話，我問佢點解唔通知一聲，阿姐話驚自己臨陣縮沙喎，我又問佢洞咗房未，阿姐話冇呀，我哋唔同房瞓，我又問佢係咪有咗，佢話係呀，我哋越講越開心。」
採訪：陳寶明、卓寶花
千里路遠這歌繼續唱汪明荃和羅家英因合作粵劇而結情緣，兩人相依相伴 20年，其間經歷不少風雨。
情路彎彎有苦有樂汪明荃與羅家英，一個認真一個遊戲人間，兩人因一齣《穆桂英大破洪州》結緣，關係亦師亦友卻又是情侶，都曾患大病經歷生關死劫，他們早已認定這一個終生伴侶。
1971年：阿姐與製衣商人劉昌華拍拖年半後結婚〈上圖左〉，有指她太專注事業，與劉昌華存分歧， 83年離異。
1981年：與何守信因主持《歡樂今宵》而生情愫〈上圖右〉，有傳阿姐因男方花心故分手，多年後何守信表示當年提出移民，汪明荃卻一心從政，故分手收場。
1987年：羅家英與粵劇名旦李寶瑩結束 13年情，翌年與汪明荃合演粵劇《穆桂英大破洪州》結緣，兩人還組成福陞粵劇團，日久生情，於 89年開始拍拖。
1995年：羅家英表示曾數度向阿姐求婚，第一次是阿姐想競選立法會議席，第二次是 95年他憑《我愛廚房》獲提名金像獎最佳男配角，阿姐未有答應。
2002年：阿姐發現患上乳腺癌及甲狀腺癌，羅家英表示會照顧她一輩子。一次他說：「阿姐患乳癌時提過結婚，我拒絕咗，之後佢有再問，我都係唔想，我知佢嬲，但冇辦法。」
2003年：阿姐舉行個唱，羅家英拿了歌迷的花向阿姐大唱《我向你求婚》，阿姐說：「咁多年嚟我慣咗獨身，唔會結婚。」
2004年：羅家英患第三期肝癌，第一個通知阿姐，當時阿姐正趕拍喜劇《我的野蠻奶奶》。羅家英憶述當時阿姐向他求婚說：「有日佢喺電話度問我：『好番之後去結婚好唔好？』」
2005年：汪明荃在港台十大中文金曲頒獎禮獲頒金針獎〈圖〉，公開答謝男友。同年羅家英接受手術後病情趨穩定，重提結婚一事，阿姐卻猶豫。 4月兩人到日本賞櫻，羅家英事先張揚買鑽戒求婚，回程後更笑言大家可以叫阿姐做羅太。
上月：兩人合演歌舞喜劇《真係阿姐──汪明荃》，羅家英再次公開向阿姐求婚。
大前日：兩人於美國拉斯維加斯低調註冊結婚。
資料來源：《蘋果》資料室
汪阿姐結婚當日所穿的紅色玫瑰嫁衣，其實是她自行發揮及設計，將一條 LV大絲巾改造而成的及膝旗袍。這款螢光玫瑰絲巾，是 LV今年向已故美國藝術家 Stephen Sprouse（ 01年 LV的 graffiti系列藝術家）致敬系列之一，售價約 7,000元。
其實阿姐在大日子自行特製 LV旗袍已不是第一次， 07年她 60歲大壽時，就曾將一條 LV藍色披肩改造成旗袍，與 fans齊齊預祝其生日。 資料來源：蘋果日報